Su Cantigu Problematicu

Mentre leggevo la rivista Logos del 2000, ho trovato un foglio nel quale era scritta una mia poesia in lingua sarda che risolveva un problema matematico, posto in versi, nella sezione della poesia curata da Tonino Sanna.

Cantigu Problematicu

S’ispelegare ti chere sa mente
Cando has tempus e senza de premura
E s’incasu non t’est de seccadura
Isolve su problema seguente.

Una famiglia de chimbe pessones
Si deven dividere in paghe santa
Francos semizadughentosettanta
Ma in disuguales purziones.

Dogn’unu leat cunforme a s’edade
E nd’ispettat pro logica e rigore
A sos pius mannos, summa pius minore
E parte manna a sa minoridade.

Senza su sou non restat nisciunu
Divisu gosi custu capitale
Inversamente proporzionale
A sos annos de vida chi hat ognunu.

In su conteggiu non b’agattas ancu
Mancar’in giuaru s’edade non nere
Cando ischis chi tenet sa muzere
De su maridu, chimb’annos de mancu.

Si sas edades d’ischire has disizu
Ecco ti las so nende sena ingannos:
Su babu giustu vintibattorannos
Hat in pius de su primu fizu.

Ei su segundu fizu ch’in fiamma
Su coro hat d’allerghia, ai custu mese
Contat precisamente vintisese
Annos de vida in mancu de sa mama.

Tue de totus s’edade indovina
Ca no est problemeddu de ischerzu
Su primu frade binchet a su terzu
Annos precisamente una dusina.

Annos chentubattordighi precisos
Hat cumplessivamente sa famiglia
E totaschimbe, senza de puntiglia
Custa summa de divider sun decisos.

In sas divisiones, sos interos
Calcuna solu, in sos chimbe totales
Trascurende sas cifras decimales
Ca cheren gai sos chimbe erederos.

De sa summa, unu francu miserabile
B'avanzat, ma ca sun de coro bonu
Poninde s'avarizia in abbandonu
L'han'a dare prò paga a su contabile.

Tue ca non ses d'algebra digiunu
Si cheres custa summa dividire,
In sa risposta mi faghes ischire
Cantos francos ispettat a dogn'unu.

Giuanne Antoni Tanda (Sedilo 28.01.1898 - Iglesias 08.12.1953)

Risposta a su Cantigu Problematicu

Cun pinna, paperi et passientzia
isorbo su Cantigu Problematicu
mancari non sie matematicu
affronto su problema cun s’iscentzia.

In paghe armonia et amistade,
sa famillia si dividit totucanta
francos semiladughetosettanta:
summa retzia in eredidade.

Sa prima cosa c’hapo craculau
sun’ p’onnia cumponente sos annos,
po totu as chimbe et chentza affannos
custu est su seguente risurtau:

Barantaduos, s’edade de su mere,
degheottannos su fizu est in su mundu,
undighi nde tenet su segundu,
trintasette nd’hat lompiu sa muzere.

Ses beranos hat bisu su piticu,
agabamos de osi cu contizu.
A unu chirru onnia meravizu:
bidimos chie est su prus riccu.

A su babu battoschentos et deghe,
po sa mere ‘e omo tando sia’
battoschentosessantachimbe ebbia.
Noighentoschimbantasette chentza neghe

Sun toccaos a su fizu, su prim’unu;
millechimbighentosessantasese
a su frade segundu de sos trese.
Duamilaottighentossettantunu

a su ch’est s’urtimu ‘e sa lista.
Unu francu b’hat ancora in pista
a istrinare cussas mentes abiles
chi si ettana a fagher sos contabiles.

Giuseppe Putzolu

Tratto da Logos (Anno VI N. 4 - Luglio 2000), la rivista bilingue edita e curata dall'Associazione Archeologica Iloi di Sedilo.

[13 giugno 2015]